Мен елімнің азаматымын

Мен елімнің азаматымын

Адиева Арайлым Бейімбетқызы

бастауыш сынып мұғалімі,

«Бостандық бастауыш жалпы білім беретін мектебі» КММ

Бостандық ауылы, Казталов ауданы

Батыс Қазақстан облысы

Пәні: өзін-өзі тану

Сыныбы: 4

Құндылық:   сүйіспеншілік

Қасиеттер: достық , бауырмалдық,  сүйіспеншілік.

Сабақ мақсаты: оқушылардың «Отан», «Ел», «Махаббат» туралы   түсініктерін кеңейте  отырып,  сүйіспеншілік  құндылығының  мәнін ашу.

Білімділік міндеттері:

-туған ел, өскен ортаның адам өміріндегі маңыздылығын түсіндіру арқылы  бауырмалдыққа үйрету.

— елге, Отанға деген сүйіспеншіліктерін арттыру;

-елжандылыққа , достыққа тәрбиелеу;

Ресурстар:(құралдар, мәлiметтер): дәптер. қалам, плакат т.б.

Сабақ барысы:

1.Ұйымдастыру кезеңi.

Оқушылардың оқу құралдарын тексеру.  «5-Т»  ұстанымын еске түсіру.

1.Тәртіп               2. Талап.        3. Тыныштық

  1. Тазалық 5. Татулық

Тыныштық сәті:     « Нұрға бөлену ».

2.Үй тапсырмасын тексеру.

С.Мәуленовтың «Мен елімді сүйемін» әңгімесін оқып келу.

Мазмұны бойынша сұрақтар:

— «Туған жерсіз адамның күні жоқ» дегенді қалай түсінесіздер?

-Сендерге өз елің несімен ыстық?

-Сендер өз еліңді сүйетіндеріңді қалай дәлелдей аласыңдар?

Сабақ барысын талдау:

Дәйексөз:    «Ел іші- алтын бесік»   халық мақалы.

Сұрақтар:

  1. Дәйексөздің мағынасын қалай түсінесңдер?
  2. Дәйексөзден не түйдіңіздер?
  3. Дәйексөзді дәптерге жаздыру.

Әңгiмелеу (мұғалімнің сыйы)

«Жақсылық пен жамандық»

Ертеде Адам ата өз ұрпағын сынау үшін адамның оң иығына жақсылықты, сол иығына жамандықты отырғызып қойыпты. Адам бір іс жасарда жақсылық “істе” десе, жамандық “істеме” деп сыбырлайды екен. Сөйтіп адамның бойында қай қасиет басым екенін байқамаққа оны сапарға аттандырыпты. Адам біраз жол жүріп, өзен жағасымен шаршап келе жатса, судың жағасына шығып қалған балықты көреді.

Балық секіріп суға жете алмай жатыр екен. Жақсылық жаны ашып:

— Адам, ана балыққа көмектесіп жібер, — десе, Жамандық:

— Қой, жөніңе жүре бер, уақытыңды алма, — дейді.

Адам балықтан әрірек асып барып, мойнын бұрып қарайды. Балық шарасыздан көзі жәутеңдеп, көмек сұрағандай болады. Адам шыдай алмай кері бұрылып барып, балықты суға салып жібереді. Балық ризашылығын білдіріп. Суда ойнақшып, секіріп, құйрығын бұлғақтатып суға сүңгіп кетеді.

Адам одан әрі жүре береді. Бір теректің қасынан өтіп бара жатып, шыр – шыр еткен дауысты естіп тұра қалады. Қараса, кішкене ғана торғайдың балапаны ұясынан құлап қалған екен. Еңкейіп енді көтерейін деп жатса, Жамандық:

— Осы торғайдың балапанына бола жолдан қалмақпысың? Оны көтеріп ұясына салу үшін, теректің басына шығу керек. Мерт болсаң қайтесің? Өзің далада ит – құсқа жем боласың ғой, — дейді.

Адам ойланып тұрып қалады. Осы сәтте Жақсылық:

— Ей, адамзаттың баласы, сен әлсіздерге қорған болып, қол ұшыңды беру үшін жаратылғансың. Мына бейшара балапанды ұясына сала кет. Шарапаты тиеді, — дейді.

Адам тағы да шыдай алмай балапанды алып, теректің басына өрмелеп шығып, ұясына салып кетеді. Балапан шиқ – шиқ етіп, қанатын қағып, разы болады.

Адам демалып алмақшы болып отыра бергенде, аяғының астында бидайдың дәнін әрең сүйреп бара жатқан құмырсқаны көзі шалады. Құмырсқа дәннің о жақ, бұ жағына шығып, қозғауға ыңғайлы ретін таба алмай, ісі өнбей келеді екен. Адам әуелі жамандықтың айтуымен құмырсқаны дәнінен айырып тастағысы келіп оқталады да, шыр – пыр болған Жақсылықтың сөзіне құлақ түрді. Ол:

— Әй, адам – ау, қалай ғана адамдығыңнан айнып кетуге әзір тұрасың. Бұл құмырсқа өзінен үлкен дәнді сүйреп, машақаттанып келе жатқанда, қол ұшыңды көрсетіп жолына салып жіберудің орнына, оны қызықтап, ермек қылғың келгені қалай? Одан да еңбек етуді осы кіп – кішкене тіршілік иесінен үйренбейсің бе? – деп налыған екен.

Адам өз ойынан ұялып, райынан қайтады. Сөйтіп Адам ата ұрпағын алдына шақырып алып:

— Міне, балам, жамандыққа ерсең жаман боласың, жақсылыққа ерсең жақсы боласың. Мен саған үш сын бердім, үшеуінен де өттің, разымын. Енді осылай адамдығыңнан айнымай, айналаңа қамқор болып, жамандыққа жоламай, жақсылыққа жолдас бол, — деп батасын береді.

Содан бері адам баласы жақсылықпен мұратына жетіп келеді екен.

Сұрақтар:

— Неліктен адам Жақсылықтың айтқандарын орындады деп ойлайсыңдар?

— «Жамандыққа ерсең жаман боласың, жақсылыққа ерсең жақсы боласың» деген ой туралы қандай пікір айта аласыңдар?

Дәптермен жұмыс. Өлеңді жалғастыр

Шығармашылық топтық жұмыс

Оқушыларды   3 топқа бөлінеді. 1 топ: ақындар 2 топ:суретшілер 3 топ: актёрлер

1-топ:  «Туған жерім -мекенім  » . Туған жерлеріне арнап өлең шығару.

2-топ: «Ауылым –алтын бесігім ». Ауылдың тамаша табиғатын бейнелеу

3-топ: «Менің туған өлкем» . Аңыз –әңгімені сахналау.

Топпен ән айту. «  Атамекен » әні.

3.Үй тапсырмасы: «Сыпайы қоян» мексика ертегісін оқу

4.Сабақтың соңғы тыныштық сәтi.

— Ал, енді, балалар бүгінгі сабақтан алған әсерлерімізді    жүрегімізге түйіп алайық.